Dövlət satınalmaları təlimi yekunlaşdı!

Updated: May 24

Aprelin 6-ı start götürən 25 saatlıq Dövlət satınalmalarının təşkili təliminin ilk sessiyası maraqlı bir formada yekunlaşdı!

Müxtəlif dövlət təşkilatlarının (Səhiyyə Nazirliyi, Təhsil Nazirliyi, Ədliyyə Nazirliyi, Maliyyə Nazirliyi, Azərbaycan Milli Elmlər Akademiyası, "Azərbaycan Meliorasiya və Su Təsərrüfatı" ASC, Qaçqınların və Məcburi Köçkünlərin İşləri Üzrə Dövlət Komitəsi, Məcburi Köçkünlərin Sosial İnkişaf Fondu, "İçərişəhər" Dövlət Tarix-Memarlıq Qoruğu İdarəsi, “Tibbi Ərazi Bölmələrini İdarəetmə Birliyi") satınalma mütəxəssisləri, eləcə də dövlət satınalmalarında iştirak edən təchizatçıların ("STP Global Cable" MMC, "AzVirt" MMC, "Bashak Supply" MMC, "Oneclick.az" MMC) nümayəndələrinin iştirakı ilə baş tutan təlimdə həftəiçi və həftəsonu olmaqla ümumilikdə 10 dərs ərzində ən son dəyişikliklər edilmiş qüvvədə olan "Dövlət satınalmaları" haqqında Azərbaycan Respublikasının Qanununun bütün maddələri və əlaqədar qanunvericilik sənədləri beynəlxalq praktika, qanunvericilikdə gözlənilən yeniliklərlə birlikdə 25 mövzu üzrə qruplaşdırılaraq əyani və onlayn formatda izah edildi. Həmçinin dövlət satınalmalarının vahid internet portalının həm satınalan təşkilat, həm də təchizatçı tərəfindən istifadəsi əyani göstərildi.


Sonuncu dərsdə 14 mayda keçirilmiş imtahan suallarının cavabları Qanunvericiliyə istinad edilərək izah edildi. Daha sonra isə qonağımız Elgün Məhəmmədəlizadə ilə birlikdə iştirakçılarla satınalma sahəsi barədə müzakirələr aparıldı.


İmtahan

Əvvəldən də bildirildiyi kimi kursun sonunda keçirilən test və sərbəst tipli olmaqla 48 sualdan ibarət əyani imtahan nəticələrinə görə Antiinhisar və İstehlak Bazarına Nəzarət Dövlət Xidmətinin Dövlət satınalmalarına nəzarət şöbəsinin müdiri Əhməd Həsənov tərəfindən 50+% nəticə göstərənlərə tamamlama sertifikatı, 50%-dən aşağı nəticə göstərənlərə isə iştirak sertifikatı təqdim edildi.


Statistika

Təlimə qoşulan 22 iştirakçıdan (14 əyani və 8 onlayn) 18-i keçirilən imtahanda iştirak etdi. Onlardan 11-i, yəni 61%-i 50 faizdən yüksək nəticə göstərərək tamamlama sertifikatı əldə edə bildi. İmtahanda orta bal 52 xal olmuşdur.

71% göstərici ilə ən yüksək nəticə göstərən iştirakçı Yusif Yusifliyə "Hər kəs üçün satınalma" və "Təchizat zəncirinin idarə olunmasının əsasları və terminlər lüğəti" kitab dəsti hədiyyə edildi!


Sonda iştirakçıların dövlət satınalmaları ilə bağlı praktiki sualları Əhməd müəllim tərəfindən cavablandırıldı və xatirə şəkli çəkilərək təlim yekunlaşdırıldı.


Təlim iştirakçılarının təlimə dair rəyləri

Təlimin sonunda iştirakçılar arasında keçirilmiş anonim sorğuda iştirak edən 13 nəfərə verilən "Təlimi 1-10 bal şkalası ilə dəyərləndirsən neçə bal verərsiniz?" sualına verilmiş cavablara görə orta bal 9.15 olmuşdur. Eləcə də iştirakçılardan təlimlə bağlı gələn fərdi reaksiyalar da kifayət qədər müsbət olmuşdur.


Məzunlarımız

Təqdim edilən sertifikatların həqiqiliyini yoxlaya bilinməsi üçün bu günə qədər tərəfimizdən keçirilmiş müxtəlif təlimlərdə sertifikat almış iştirakçılar (ad-soyad, sertifikat nömrəsi, təlimin adın və tipi) barədə məlumatlar "Təlim" səhifəmizdə "Məzunlarımız" bölümü yaradılaraq əlavə edilib. İştirakçılardan LinkedIn profili olanların bəzilərinin profilləri ilə adları əlaqələndirilib (hyperlink).


Başqa təlim olacaq?

Təlimin növbəti sessiyasının daha geniş formatda Əhməd müəllimin iştirakı ilə sentyabrın əvvəlində keçirilməsi planlaşdırılır. Bundan başqa "Dövlət satınalmaları" haqqında Azərbaycan Respublikasının Qanununun və əlaqədar qanunvericilik sənədlərinin A-dan Z-yə ətraflı izah edildiyi 12 saatlıq təlim kursunun iyulun ortasında başlanması nəzərdə tutulub. Hər iki təlimə qeydiyyat barədə yaxın zamanda məlumat veriləcək.


Tərəfimizdən keçirilən digər 6 təlimimiz barədə bu səhifədən məlumat ala bilərsiniz. Təlimlər, eləcə də digər məlumat və yeniliklərdən vaxtında xəbərdar olmaq üçün bizi sosial şəbəkə hesablarından izləyə, eyni zamanda abunə ola bilərsiniz!