Dövlət satınalmalarının vahid internet portalı

“Dövlət satınalmaları haqqında” Azərbaycan Respublikasının Qanununda 28 dekabr 2018-ci il tarixində edilmiş dəyişikliyə əsasən ehtimal məbləği 50 min AZN - 3 milyon dollar (5.1 milyon AZN) arasında olan tenderlərin elektronlaşdırılması nəzərdə tutulmuşdur. Buna əsasən Elektron Hökumətin İnkişafı Mərkəzinin təşkilatçılığı ilə etender.gov.az dövlət satınalmaların vahid internet portalı yaradılmışdır.

Dövlət satınalmalarının vahid internet portalının fəaliyyətinin hüquqi, təşkilati və texnoloji əsasları Azərbaycan Respublikası Prezidentinin 2019-cu il 16 aprel tarixli 647 nömrəli Fərmanı ilə təsdiq edilən Dövlət satınalmalarının vahid internet portalı haqqında Əsasnamədə öz əksini tapmışdır. Həmin əsasnamənin 2-ci bəndinə əsasən Antiinhisar və İstehlak Bazarına Nəzarət Dövlət Xidməti dövlət satınalmalarının vahid internet portalının operatoru olaraq müəyyən edilib.


Portalda ilk elektron tender Azərbaycan Respublikasının Gənclər və İdman Nazirliyi tərəfindən 11 iyun 2019-cu il tarixində elan edilmişdir.


Antiinhisar və İstehlak Bazarına Nəzarət Dövlət Xidmətinin icraçılığı ilə Qanuna 27 may 2021-ci il tarixində edilmiş dəyişikliyə əsasən isə ehtimal məbləği 50 min manatdan aşağı olan kotirovkalar da elektronlaşdırılmışdır.


30 dekabr 2021-ci il tarixində "ASK Şüşə" MMC tərəfindən ilk elektron kotirovka elan edilmişdir.

Bu günə qədər (25.02.2022) portalda 804 elektron tender və 303 elektron kotirovka keçirilmişdir.


Elektron informasiya ehtiyatlarının (məlumat bazaları, məlumat-axtarış sistemləri, reyestrlər və digər informasiya resursları) dövlət satınalmalarının vahid internet portalına inteqrasiya olunması hədləri təsdiq edilməsi barədə Azərbaycan Respublikası Nazirlər Kabinetinin 29 yanvar 2022-ci il tarixli 38 nömrəli Qərarına əsasən dövlət satınalmalarında sahibkarlar tərəfindən müxtəlif dövlət qurumlarından (İqtisadiyyat Nazirliyi, o cümlədən Dövlət Vergi Xidməti, Ədliyyə Nazirliyi, Əmək və Əhalinin Sosial Müdafiəsi Nazirliyi və dolayı olaraq Mərkəzi Bank) kağız formasında alınan malgöndərən (podratçı) haqqında tələb olunan sənədlər (o cümlədən ixtisas göstəricilərinə dair məlumatlar) və banklardan alınan tender və müqavilənin yerinə yetirilməsinə dair təminatlar elektronlaşdırılaraq heç bir yerə getmədən elektron imza vasitəsilə almaq mümkün olacaq!


Qeyd edək ki, yaxın gələcəkdə bütün satınalmaların elektronlaşdırılması planlaşdırılır!


Əgər siz dövlət satınalmalarının vahid internet portalı vasitəsilə elektron satınalmaların keçirilməsində çətinlik çəkirsinizsə 5-30 aprel tarixində əyani və onlayn təşkil ediləcək 20 saatlıq "Dövlət satınalmalarının təşkili" təlimində dövlət satınalmaları qanunvericiliyinin dərinliklərini öyrənməklə yanaşı əyani təqdimatla portaldan həm elektron tender, həm kotirovkaların keçirilməsini praktiki olaraq öyrənə biləcəksiniz! Təlim barədə digər suallarınız üçün bizimlə əlaqə saxlaya bilərsiniz.